Zdravi i veseli bili – Ča su jili naši stari : Marmelada o’ maginj’

PODIJELI
Fruits of the strawberry tree from Mljet island, Croatia

“U stara vrimena se radila marmelada o maginj’ ča bismo ji nabrali po Kozjaku, u kojemu jema svakakvega blaga Božjega. Mi dica bi lizali prste jer smo baš volili marmeladu o’ maginj. Ona je za nas bila ka najslaji kolač. Na Kozjaku oli po po’ju bi’mo nabrali zrili maginj, a onda bi ji doma najprin narizali na manje komade pa bi ji pozatin zgnječili u velikoj dubokoj teči. Onda bi se doda cukar, sok od jednoga limuna i još 1 limun narizan na fete.
U novije vrime se u marmeladu meće i vanilin cukar, a u staro vrime tega cukra nij bilo.
Na oko tri kila zrili speštani maginj meklo bi se oko kil i po cukra, to bi se promišalo i ostavilo da stoji priko noći, a onda bi se ujutro tome svemu doda sok od 1 limuna i 1 limun narizan na fete. To bi se stavilo kuvat dok ne uzavre, a kad bi uzavrilo, smanjila bi se vatra i nastavilo bi se kuvat oko dvi i po ure.
Nike žene znale bi napola skuvane maginje procidit kroz pašabrod, ali to je samo onda ako ne voliš pod zubiman oćutit one mrvice o’ maginje.
I eto, kad bi marmelada bila gotova spremila bi se u staklene boce, i jila bi se s gušton”, ispričala nam je naša teta Lela, gospođa Nedjeljka Muftić iz Kaštel Sućurca.

Renata Dobrić